rssgaur8 logotipoa

Belgikako krisiaz

Belgikako gobernuaren hamaikagarren kolapsoa suertatu da azken aste-egunetan. Urteak daramate egoera konpondu ezinik. Flandestar eta Waloniar arteko negoziazioak ez dute akordiorik erdiesten. Bien jarrera eta helburu antagonikoak ikusirik nekez lortuko dute.

Eta badirudi ekainean hauteskundeak ospatuko dituztela berriro ere. Hauteskunde posible hauen karira bi gauza azpimarratu nahi nituzke.

Lehenik, BHV aferak eragin du berriz ere gobernuaren dimisioa. Baina gogoratu dezagun BHV gaiari loturik Belgikako gorteek emandako epaia: BHV konpondu ezik hauteskundeak legez kanpokoak izango lirateke. Beraz, lehenik eta behin ikusi beharko da hauteskundeak egitea legala den ala ez. Belgikan debate izugarria dago gai honen inguruan. Ziur nago zirrikituren bat aurkituko dutela hauteskundeak ospatu ahal izateko, baina Flandeseko hainbat alkate (alderdi ezberdinekoak) jada aurreratu dute hauteskundeak egitekotan boikot kanpaina bultzatuko luketela. Horra hor lehenengo arazoa.

Bigarrenik, hauteskundeak gaur burutuko balira, alderdi abertzaleek, eta bereziki N-VA alderdia izango lirateke igoera gehien izango luketen alderdiak Flandesen. Alderdi hauen jarrera BHV gaiari dagokionez tinkoa da, eta ez dirudi aldatuko dutenik.

Zaila da ahaztea duela 100 urte Bruselako biztanleen gehiengoa nederlandera hiztuna zela. Egun nederlandera hiztunak gutxiengo gutxitu bat dira. %15era ere ez dira heltzen. Azken 100 urteetako politika frankofonoaren eta flandestarrekiko diskriminazioaren ondorio da hau.

Waloniar eta frankofonoak BHV-rekin eskatzen dutena onartu ezina da. Hau da, Brusela hiria handitzen doa, eta ondoko herrietara gero eta frantses hiztun gehiago doa bizitzen, eta hauen asmoa da BHV osatzen duten herriek Flandes izatetik Bruselako parte izatera pasa daitezen. Errepikatuko ez den eszepzioa dela diote, baina inork gutxi sinisten die Flandesen. Jakin badakite BHV lurraldearekin amore ematen badute etorkizunean beste zonalde batzuetarako berdina gertatuko litzatekeela.

Bitxia da, walonian milaka flandestar ere bizi direlako, baina hauek guztiak frantsesa ikasi egin dute eta bizitzera joan diren herrietara moldatu egin dira. Belgikan frankofonoak nahi dutena, gainontzeko guztiak haien baldintzetara egokitzea da.

Erresuma Batuko hauteskundeak

Erresuma Batuan hauteskunde orokor eta munizipalak ospatuko dira Maiatzaren 6ean. Gordon Brown eta David Cameron dira hautagai nagusiak alderdi laborista eta kontserbadorea ordezkatuz hurrenez hurren.

Duela hilabete batzuk nahiko argi zirudien David Cameron bilakatuko zela datozen urteetako lehen ministro britaniarra. Horrela zioten inkesta guztiak. John Major izan zen azken lehen ministro kontserbadorea.  1997urtea geroztik  egondako lehen ministroak laboristak izan dira. Tony Blair eta Gordon Brown.

Oraindik ere argi dirudi David Cameronek hauteskundeak irabaziko dituela, baina horren argi ez dagoena, gobernua osatzeko behar besteko garaipena lortuko duen da. Eta ez badu lortzen, orduan beste alderdi batzuk izandako emaitzak, bereziki Liberal Demokratena,  berebiziko garrantzia izan dezake. Erabakiorra suerta liteke.

Liberal Demokratek argi utzi dute dagoeneko. Ez dute Gordon Brown buru duen Gobernu bat sustengatuko. Ez dute baina esan, gobernu laboristarik ez luketenik sustengatuko. Kontserbadoreen garaipena nahikoa ez bada, laboristek gobernua osatzeko ordaindu beharko luketen prezioetako bat Gordon Brownen burua da. Gordon Brown-en hautagaitza baztertu eta berria aurkeztu, eta susmoa daukat hori egiteko arazo handirik ez luketela izango.

Bi alderdi nagusien arteko diferentzia oso txikia bada, orduan, ordezkaritza txikiagoa daukaten alderdiek erabaki zezaketen gobernuaren etorkizuna. Ipar Irlandako alderdi unionistek, tradizionalki, alderdi kontserbadorearen alde agertu izan dira. Sinn Fein ez du Westminsterreko parlamentuan parte hartzen nahiz eta hauteskundeetara aurkeztu. Eskoziar SNP, Galestar Plaid Cymru izan daitezke giltzak, baina garesti salduko lituzkete haien botoak…

Apustu gehienen arabera David Cameron izango da datorren Lehen Ministroa Erresuma Batuan. Hala ere, faborito izateak ez du garaipena ziurtatzen.