Mundua Begira

Hauteskundeak Norvegian

Irailaren 14ean hauteskundeak burutuko dira Norvegian. Parlamenturako hauteskundeak. Egungo gobernua alderdi sozialdemokrataren esku dago, Senterpartiet eta SV ezkerreko alderdiekin koalizioan.

2005ean koalizioa osatu zutenean, kanpo politikarako Soria Moria akordioa adostu zuten. Nire ustez akordio hau oso positiboa suertatu da zenbait gauzetan. Soria Moria akordioaren ondorioz harturiko lehen erabakia Europar Batasuneko zerrenda beltza Norvegian ez aplikatzea izan zen. Horretarako kanpo aferetako ministroak eman zuen arrazoiaz gainontzeko Europako mandatariak ikasi beharko lukete. Bere ustez zerrenda beltzak munduko hainbat tokiko bake prozesuetan modu positiboan eragin ahal izateko oztopo handia bilakatu zitekeen.

Gatazketako alde bat kriminalizatzeak ez omen du ezertan laguntzen, eta elkarrizketa, negoziazioa eta akordioak zaildu egiten ditu.

Ez dut esango Norvegiar gobernua azken lau urteetan bikaina izan denik, baina gai honetan behintzat, bere jarrera eredugarria izan dela esango nuke.

Eskandinaviar herrietan eskuinerako joera nabarmena ematen ari da azken urteetan. Sozialdemokraziaren lurraldea izan da urteetan baina egungo mapa politikoa aztertzen badugu konturatuko gara gauzak dezente aldatu direla. Danimarka, Suedia eta Finlandian eskuina dago gobernuan. Islandia  Eskandinavian ohitura sozialdemokrata hau izan ez duen herria bada ere, gobernu sozialdemokrata du egun, Norvegia bezala.

Eskandinavia nahiko euroezeptikoa izan da ere bai. Baina, Islandia Europar batasunean sartzen bada Norvegia, Faroe eta Groenlandia bakarrik geratuko dira kanpoan. Estatu bakarra eta estaturik gabeko bi herri.

Norvegiar hauteskunde hauek garrantzitsuak dira beraz, Norvegia, Eskandinavia eta Europar Batasunaren etorkizunerako.

Toki gutxitan irakurriko badugu ere, Norvegiar hauteskundeekin batera Sami parlamenturako hauteskundeak ere burutuko dira irailaren 14ean. Baina hauetaz hurrengoan arituko gara.

30 urte

Elitezko kirolek ere, gure gatazkaren nazioarteratzean lagundu egiten dute. Dudarik ez daukat. Athletic-ek Suitzan jolastu berri duen partidura, Euskal Herriarekiko elkartasuna jorratzen duten hainbat suitzar hurbildu zen, jaiaz gozatu eta aldarrikapen politikorako ere erabili zuen aukera. Norvegiara doaz orain. Errepikatu bedi ekimena. Tour-eko etapa bat zuzenean ikustera joan den edonor badaki, ehunka, milaka direla bertara doazen euskaldunak, lasterketaren errepidea pintadaz betea agertzen dela lasterketaren egunean. Askok gogoratuko dute pasadan urtean La Mongie pareko zelai batean gertaturikoa… Surflari ospetsu bat atxilotu berri dute Euskal Herrian, zer eta, Gazte Sarea ekimenean parte hartzeagatik. Europar Batasuneko Komisioak, eta estatu kide askotako administrazioek Gazte sarea moduko proiektuak bultzatu, sustatu eta ekonomikoki lagundu egiten dituzte. Parte hartze herritarra, eta bereziki gazteen parte hartzea haien helburu estrategikoetako bat ei da. Gurea beste mundu bat da, eta kirolarekin konparaketa jarraituz, Espainiar gobernuari Gazte Sarerik ez zaio gustatzen baina bai aldiz “gazte sarekadak “. Madril olinpiadetarako hautatua baldin bada, ez litzaidake harrituko, “kirol” modalitate hau olinpikoa bihurtzen saiatuko balitz. Urrea ziurtatua zukeen. Euskal Herriko gazte mugimendu abertzaleak 30 urte ospatuko ditu. 30 urtea hauetan burutu duten lana ohiartzun eta eragin handia izan du Euskal Herrian, baina baita Euskal Herritik haratago ere. Europako herri ezberdinetatik egin ditudan bidaietan behin eta berriro entzun dudan gaia da hau. Italian, Alemanian, Norvegian, Holandan, Flandesen eta abar gazteak eta ezkertiarrak diren gazte antolatu asko Euskal Herriko gazte mugimendu abertzale antolatuak buruturiko lan mardula eredugarritzat ikusi izan dute.