Hetzordua

Hauteskundeak NUPen

Gaur UPNan, barkatu, NUPen, hauteskundeak dira. Hiru hautagai aurkezten dira ultraeskubitik sozialdemokraziara doazenak, hiruak ala hiruak, “navarros y forales”, noski. Aurreko artikulu batean esaten nuen euren arteko ezberdintasun nabarienak Futurama seriean agertzen diren Jack Johnson eta John Jacksonek dituzten berdinak direla. Batek ere ez du argitu zein den bere jarrera euskarak behar eta merezi duen posizioa eduki dezan. Batek ere ez du esan Bologna Prozesuaren inguruan duda handiak daudela ere… batak ala besteak irabazi egoera oso antzekoa izango da. Ez berdina, noski, baina euskaldunoi bost!

Orain dela bi agintaldi zegoen errektore alkanforatuak ez zuen ezer egin euskararen egoera hobetzeko. Are eta gehiago, egoera okertu egin zuen. Agintaldi honetan egon den errektoreak ez du ezer lortu (ikusi besterik ez dago Aitziber Larreak Garan igandean hainbeste eragileren izenean idazten zuen artikulua).

Egoera horrela mantentzearen erruetako bat demokrazia sistema bitxian oinarritzen da, non 500 bat pertsonek bozken %51a duten eta beste 8.500 ingurun beste %49a. Sistema bat non langile funtzionarioen korpusak erabaki dezakeen beste guztien gainetik. Non pertsona bat bozka bat oinarria ez den betetzen eta non estatus konkretu bat eduki behar duzun hautatua izan ahal izateko. Gaur unibertsitateko gutxiengoak erabakiko du zein den gehiengoarentzat onena. Honek badu izen bat: despotismo ilustratua.

Hauteskunde eguna da, baina ez da gehiegirik erabakiko. Hiru hautagai egoteak bigarren itzuli bat egongo dela ia-ia ziurtatzen du. Royal edo Sarkozy, Kerry edo Bush… horrelakoa balitz, gutxienez. Ziurtasunez esan daitekeen bakarra zera da: ultraeskuineko hautagaiak (dei dezagun Jack Johnson)  aurrez aurre edukiko duena beste bietako bat izango dela, eta euren artean jada bozka bateratzeko proposamen bat ba omen dago. Nor izango ote da gure John Jacksona?

This entry was posted on Asteartea, apirila 24th, 2007 at 8:56 am and is filed under Unibertsitatea. You can follow any responses to this entry through the RSS 2.0 feed. You can leave a response, or trackback from your own site.